Білім алушылардың оқу жетістіктерін бағалайтын халықаралық бағдарлама (ағыл. Programme for International Student Assessment, PISA) — Экономикалық ынтымақтастық және даму ұйымы (ЭЫДҰ) әр үш жыл сайын өткізетін 15 жастағы жасөспірімдердің оқу, математика және жаратылыстану сауаттылығын бағалайтын халықаралық салыстырмалы зерттеуі. PISA 15 жастағы білім алушылардың шынайы мәселелер мен міндеттерді шешу үшін әлеуметтік және экономикалық өмірге толыққанды қатысуға қажет білім мен дағдыларды пайдалануға қаншалықты дайын екенін бағалайды. Ұлттық есепте қазақстандық білім алушылардың оқу, математика және жаратылыстану сауаттылығы бойынша нәтижелері халықаралық және ұлттық контексте салыстырылып талданды. Есеп басқарушылық және педагогикалық шешімдер қабылдауға арналған құнды аналитикалық ақпаратты қамтиды және жалпы жұртшылықтың назарына арналған.
