20 ақпан мен 10 наурыз аралығында халықаралық TALIS зерттеуінің апробациялық кезеңіне 41 мектептің директоры мен 773 мұғалімі қатысты. Зерттеудің негізгі кезеңі 2024 жылы 55 елдің қатысуымен өтеді.
TALIS (Teaching and Learning International Survey) – мұғалімдер мен мектеп директорлары арасында алты жыл сайын сауалнама жүргізу арқылы мұғалімдердің еңбек жағдайлары мен мектептердегі білім беру ортасын бағалайтын жалғыз ауқымды халықаралық зерттеу.
Апробацияның мақсаты - ұлттық сұрақтардың өзектілігін тексеру және негізгі зерттеуге нақты құралдарды даярлау үшін барынша көп дерек жинақтау болып табылады. Өткен жылы апробациялық зерттеуге дайындық барысында «Ахмет Байтұрсынұлы атындағы «Талдау» ұлттық зерттеулер және білімді бағалау орталығы» АҚ білім беру саласындағы сарапшылармен ұлттық сұрақтарды сауалнамаларға қосуды талқылау мақсатында кездесу өткізді.
Кездесуге «Өрлеу» біліктілікті арттыру ұлттық орталығы» АҚ «Назарбаев Зияткерлік мектептері» ДББҰ Педагогикалық шеберлік орталығы, Ыбырай Алтынсарин атындағы Ұлттық білім академиясы, Білім беру мазмұнын сараптау республикалық ғылыми-практикалық орталығы, Қазақ ұлттық қыздар педагогикалық университеті, Абай атындағы Қазақ ұлттық педагогикалық университетінің өкілдері қатысты.
Қазақстан TALIS зерттеуіне алғаш рет 2018 жылы қатысты. Жүргізілген зерттеу нәтижелері бойынша мұғалімдердің күнделікті жоспарлау мен кәсіби біліктілігін арттырудан бастап жұмысқа қанағаттану деңгейіне дейінгі ағымдағы жұмыс әрекеттері туралы деректер алынды.
Алынған нәтижелер «Педагог мәртебесі туралы» Заңды әзірлеу кезінде ескерілді, сондай-ақ Білім және ғылымды дамытудың 2020–2025 жылдарға арналған мемлекеттік бағдарламасында көрініс тапты.
TALIS-2024 циклінің негізгі зерттеу нәтижелері алдыңғы циклдің деректерін салыстыруға және мұғалімдердің еңбек жағдайлары қалай өзгергенін және қабылданған шаралар олардың кәсіби қызметі мен жұмысқа деген көзқарасына қалай әсер еткенін бағалауға мүмкіндік береді.
