2025 жылдың 19 ақпанында DARYA жобасы аясында колледж түлектері мен жұмыс беруші кәсіпорындар арасында жүргізілген сауалнамалардың нәтижелері ұсынылды. Зерттеуді Еуропалық білім қоры «А. Байтұрсынұлы атындағы «Талдау» ұлттық зерттеулер және білімді бағалау орталығы» АҚ («Талдау» АҚ) және басқа серіктестермен бірлесіп жүргізді.
DARYA жобасы – Еуропалық Одақтың Орталық Азиядағы жастарды қолдауға, еңбек нарығындағы инклюзивтілік пен дағдыларды дамытуға бағытталған өңірлік бастамасы. Пилоттық зерттеулер аясында 2 модуль бойынша нәтижелер көрсетілді:
1-модуль – «Талдау» АҚ және «Talap» КЕАҚ бірлесіп жүзеге асырған «Колледж түлектерінің сауалнамасы». Нәтижелерді «Талдау» АҚ маманы Кусаинова А.Д. таныстырды.
2-модуль – «Кәсіпорын қызметкерлерінің құзыреттеріне сауалнама», «KazLogistics» одағы халықаралық сарапшы Ина Питчманның қолдауымен өткізілді.
Деректердің талдауы Қазақстандағы жүк тасымалы секторында жұмысқа орналасу үрдістері мен білікті кадрларға қажеттілікті анықтады. Пилоттық сауалнама нәтижелері цифрландыру мен автоматтандыру жағдайында мамандандырылған кадрларды дамыту маңыздылығын көрсетті. Қызметкерлерге тек техникалық дағдылар ғана емес, сонымен қатар сыни ойлау мен командада жұмыс істеу сияқты когнитивтік қабілеттер де қажет. Шағын және орта кәсіпорындарға қызметкерлерін кәсіби оқыту үшін көбірек мүмкіндіктер қажет.
Икемді еңбек құрылымдары мен бейімделгіш стратегиялар еңбек нарығындағы тұрақсыздықты төмендетуі мүмкін. Қызметкерлердің дағдыларын дамытуға салынған инвестициялар саланың тұрақтылығын қамтамасыз етеді. 2025 жыл Қазақстанда «Жұмысшы мамандықтар жылы» деп жарияланған, бұл техникалық және кәсіптік білімнің (ТжКБ) және түлектер мониторингінің маңыздылығын айқындай түседі.
Жобаның халықаралық сарапшысы Ина Питчманн сауалнамалардың нәтижелері бойынша аналитикалық есептерді ұсынды. Қатысушылар мамандарды даярлаудың тиімділігін арттыру үшін ынтымақтастықты одан әрі жалғастыру қажеттігін атап өтті.
