2024 жылғы 24–28 маусымда Тайбэй қаласында ICILS-2023 зерттеуінің ұлттық үйлестірушілерінің 5-халықаралық кездесуі өтті

ICILS-2023 Халықаралық компьютерлік және ақпараттық сауаттылықты зерттеу нәтижелерін талқылау бойынша халықаралық кездесуді IEA (Оқу жетістіктерін бағалау жөніндегі халықаралық қауымдастық) және Тайвань мемлекеттік педагогикалық университеті ұйымдастырды. Кездесуге Қазақстан, Әзірбайжан, Америка Құрама Штаттары, Оңтүстік Корея, Оман және Еуропалық Одақ елдерін қоса алғанда, 34 елдің 50-ден астам өкілі қатысты.

Қазақстан тарапынан кездесуге "Талдау" АҚ Халықаралық салыстырмалы зерттеулер департаментінің маманы, ICILS жобасының ұлттық менеджері М.М. Василова қатысты.

Кездесуге қатысушылар ағымдағы жылдың 12 қарашасында жұртшылыққа қолжетімді болатын халықаралық есеп тарауларының бастапқы нұсқаларымен танысып, ұлттық есептерде нәтижелерді жариялау мәселелерін талқылады, сондай-ақ IEA IDB Analyzer бағдарламалық жасақтамасында деректерді талдауды үйренді.

Бес күндік кездесу аясында келесі сессиялар қамтылды:

• ICILS-2023 үшінші циклінің нәтижелері;
• Техникалық зерттеу стандарттары және қатысушылардың мақсатты тобын іріктеу;
• Жаһандық COVID-19 пандемиясының білім беру жүйесіне әсері;
• Жасанды интеллектті келесі ICILS циклына кіріктіру жоспарлары.

Панельдік пікірталас кезінде қатысушылар ICILS-2023 жүргізу және алдағы уақытта зерттеу материалдары мен нәтижелерін пайдалану тәжірибесімен бөлісті, атап айтқанда:

• оқу бағдарламаларын жетілдіру;
• педагогикалық мамандықтардың мазмұнын жаңарту;
• мұғалімдердің кәсіби дамуы;
• құпиялылық режимінен шыққан ICILS тапсырмалар негізінде мұғалімдерге арналған әдістемелік құралдарды әзірлеу;
• статистикалық маңызды айырмашылықтар анықталған нәтижелерге қосымша зерттеу жүргізу.

Кездесу соңында, IEA өкілдері талқылауды қорытындылады және ICILS-2023 зерттеуінің барлық үдерістеріне белсенді қатысқаны үшін Ұлттық орталықтардың өкілдеріне алғыс білдірді.